जाळण्या अंधाराला

पेटली मशाल, पेटली विशाल
पेटली निशा सारी पेटली दिशा
भडकला तो ज्वाला sssssss
जाळण्या अंधाराला !!

मैत्री कालची वैरी झाली
जखम नव्याने गहरी झाली
खेळ मांडला पुन्हा सूडाचा
दुभांगला मावळा गडाचा
वाचा फुटली नव्याने
जुल्म अत्याचाराला !!

रंग प्रीय ते झेंड्याचे झाले
कळप पुन्हा मेंढ्याचे झाले
द्वेष एकमेका अनावर झाला
माणूस पुन्हा जनावर झाला
अंधार समजुनी मारती
जो तो खऱ्या सूर्याला !!

मशाल कालची कधीच विझली
वस्त्या पेटविण्या आज वैरी उठली
बदलाची आशा सोडून द्या रे
दंगलीत तल्लीन झाली सारे
एक होवूनी सावध व्हारे
उधाण आले दर्याला !!

न पटणारे सत्य.....

न पटणारे सत्य.....

त्याला देवाच्या गोष्टी
सांगू नका साहेब
तो एक नास्तिक आहे 
आताच तो बुद्धाच्या
मूर्तीसमोर नतमस्तक
होऊन आलाय.........

त्याला देवाची व्याख्या
सांगू नका साहेब
तो विज्ञानवादी आहे
त्यांनी मूर्ती भंजक
बाबासाहेबांनाही
परमपूज्य उपमा दिली....

त्याला जातिवाद
शिकवू नका साहेब
तो जातीअंताची
लढाई लढत आहे
आपल्या जातीचा
उदोउदो करून
दुसऱ्या जातीवर शिंतोडे
उडविण्यातच त्यांनी
सारे जीवन व्यथित केले....

त्याला महापुरुषाच्या
गोष्टी सांगू नका साहेब
त्यानी त्याचा महापुरुष
जातीच्या दावणीला
बांधलाय
अन् खुशाल टीका करतोय
दुसऱ्या जातींच्या
महापुरुषावर.....

त्याला धर्माच्या गोष्टी
शिकवू नका साहेब
त्यांनी कधीच
जाती धर्माला
तिलांजलि वाहिली
तो नुकताच
श्रामनेर मधून आलाय.....